1 Thessalonians 3
1Ijihuni hahi vea ka'ene nú areri pakirasahuna'e henareja nú vwihajajaho maijaho areme iki Atenisi hi'ipisana ronare'e hiju. 2'Ene hu Timoti núni vwea ka'ene nú pu'úmo Godoni kaukara veji'ina ka'ene Keriso oni vu'a maa maiu'ina 'waravi'ina ranavu'e ja ni'ajihe joni nimairoa kisina'e re'amarono vu'u. 3'Ejakame jara siseisei hijujara ja patanu'urihuna. Ijihuni maijaho ja niheju nú nika'ina hihuna'e iji pijúhana. 4Núra ja pu'úmo hijajino nú ja pu'úmo sise'i 'ahúhunaka 'waravajaho ja nihejara'omo iviamaa ija'ina renu. 5Ijihunihahi na areri pakairahuna'e henarejo joni nimaa roijí he'i 'ahiu'e ranavu'e vu'u. Ijihuni maijaho na oja hianimujaho vejuro'i pisivisavi'inijara pisimiakame núra kaukara ka'ene vejajaho maa pa'ana'e rena ve'amarono ranavu'e vu'u. 6Iviamai Timotiho ijí joni rene joni pinana maa apene 'unama núni roana. 'Ene jara Godi nimaa rone oja mahe ija kisi apene joni una'i saname vejujaho ro 'warumana. Jara na'ia mapoka nú vwihanúe nú ura ja ki'i 'ahúu ja'ina'e areri ja 'u'o ura nú kú'i 'ahiu. 7Vwehu núne nú ijihuni hahi iki hijujaho sisea piuname ahisina apeji'i hijura kaivo jara niho'o nimaa rojujihuna'e nú oja sonahúu. 8Jara Natohwi jihuni vaji kirasahe namijujara reju'e nú hami hiju. 9Nú ichá'ina'e jonijihuna'e Godi teimani 'wa'eja? Ijihuni maijaho núra temara ka'ene jonuna'i 'ekajihuni hahi nú Godoni una'i jonijihuna'e temarasahura. 10'Ene nú na'ia 'ee veiri'a majaa hine joni niura kihuna'e siporua 'ojura'omo roe kime raka ka'ene joni nimairoa vaji panavujaho ni'ajihe areri rehuna. 11Godi ka'ene núni Omijara Huhusune 'ee Jesu ka'ene núni Natohwiji'o núni 'unama venuhakame nú vu'e ja kihuna. 12Natohwijara venae jara ea kwinu kwino oja 'ekaravura 'ee emaa maho'o oja 'ekaujaho emarene 'ee ameurahe arihama areri núra jonuna'i vejuja'ina'e renama. 13'Ene Hu ja vena'e joni oja Godi ka'ene núni Omijihuni una'i ariramaa rene panama'eje núni Natohwa Jesuho 'ee Huni ea ariramaijipo Hu hu'úmo roavari veijaho matauma namihuna.
Copyright information for
MCQ